Natale, se fa festa mpàraviso
‘o Padreterno chiamma l’adunata
e tutt’’e stelle correno a ll’appello
da na curona ‘e luce arravugliate.
“’O voglio d’oro ‘o cielo chesta notte,”
“hann’’a brillà tutt’’e costellazione,”
“ s’è ffatta sera, iàte, a nomm’’e Ddio,”
Passàte â porta p’’a destinazione.
E vanno ‘e stelle, iesceno mparànza
spànneno tanta luce attuorno attuorno
ca, comme pe’ miraculo, a ‘ntrasatta,
è notte e ncopp’ô munno schiara juorno!
Nu reggimento ‘e chiù ‘e nu melione
sarrànno ‘e stelle cumannàte ccà,
a Napule ce teneno a sti ccose
e ‘e chesta notte nun se pô sfigurà!
Na stella capuriòna dice : “Leste!”
“voi al lungomare, â stesa ‘e Margellina”
“vuie ‘ncopp’ô Capo, abbàscio Marechiaro”
“ e vuie ô Vòmmero fino a San Martino!”.
“Vuie îte appiccià ‘o salotto”
“a via dei Mille, a Chiaja,”
“ vuie a Ischia, a Capri, a Pròceta”
“llà ce ne vonno assaie!”.
E Napule s’allumma
cu ‘e lluce ‘e tutte chesti stelle
comme na principessa
p’’a festa soia chiù bella!
Na stelletella nova ‘int’ammuina
se mbroglia, nun capisce, corre, vola
nun è mmaie asciùta, nun cunosce ‘e strate,
se sperde e dint’a nniente resta sola…
“ E mo che faccio?”-penza ‘a stelletella-
“i’nun cunosco niente ‘e sta città”
“ vabbuò me metto ncerca e addò sta ‘a luce”
“ vo dì ca ‘e cumpagnelle stanno llà!”.
Se sape po’ quann’uno nun cunosce
chiù se ncammina e chiù nun trov’’a via,
ato ca Marechiaro e Margellina,
‘a stella piglia ‘a part’â Ferrovia!
Passa p’’e strate chiù sulagne e scure,
pe’ ncopp’â Stella, p’’e viche â Sanità,
d’’o Duomo se ne scenne pe’ Furcella,
nnant’â Stazziona s’ha da repusà!
E vede chello ca ancora nun sapeva:
uommene stise ncopp’a nu cartone!
‘a curiosa le s’accosta sotto
e…songo nire sì comme ‘o gravone!
Ma comme-penza-e ccà nun era festa?
e sta povera gente mmiez’â via?
E pe’ capì s’avvia chiù nnanz’ancòra
pe’ mmiez’ê ccase d’’o Vasto â Ferrovia.
E smicciànno po’ pe’ddint’’e ssenghe
ne vede tante ‘e chelli facce nere,
ammuntunàte, vinte ‘int’a na stanza
e comme bestie dòrmeno a ffilère!
‘E stanze sporche pàrleno ‘e miseria,
l’aria è nu tanfo ca nun fa sciatà,
e songo pate, mamme, creature…
Madonna mia, ma è vvita chesta ccà?
‘A puverella nun se fa capace
“ ma che simmo venute a illuminà?”
“ ma che ‘o Bambino nasce”
“ sulo ‘int’’e pparte belle d’’a città?”.
E triste e sola ‘a stelletella chiagne…
Ma ‘e llacreme ‘e na stella songo d’oro,
comme na pioggia ‘e luce chesti gocce
càdeno dint’’e strate a da’ culore,
sciuliànno ncopp’’e llastre ‘e ggocce d’oro
scètano ‘a dint’ô suonno a cchisti nire
e dint’â notte ca s’è ffatta chiara
nu pate chiagne, na creatura rire…
E ‘a stelletella ca s’era sperduta,
ca nun sapeva manco ch’êva fà’,
chiagne felice sì pe’ tutt’’a notte,
chiagne e riluce pe’ se fa guardà…
Albante juorno po’ ‘a paranz’’e stelle
vedènno can un torna ‘a va a cercà
e ‘a trova mmiez’ô Vasto â Ferrovia
ca tremma, è stanca ma nun se vô stutà!
“E allora, tuorne?”-dice ‘a Primma Stella-
“che fine he fatto? Nun t’îmmo visto chiù!”,
“ nuie îmmo allummato Napule stanotte”
“ e ncielo ce mancave sulo tu!”.
Mo dorme ‘o Vasto, mo dorme ‘a Ferrovia,
e veglia sulo na nennella nera,
‘a stella ‘a nzerra ll’uocchie cu nu vaso
e le prumette: “Aspettame stasera!”.
Ino Fragna (1991)
propria città.
Il Blog di Claudia Pizzi 